MAMBO YA NDONDO CAP WAGANGA WA KEKO FURNITURE WAVAMIA NDONDO CUP

Jana jioni ulichezwa mchezo wa Sports Xtra Ndondo Cup hatua ya 16 bora kati ya Keko Furniture dhidi ya Buguruni FC mchezo uliomalizika kwa Keko Furniture kuibuka na ushindi wa goli 2-1 hatimaye kusonga mbele kwenye michuano hiyo wakati Buguruni FC wao wakiwa wametupwa nje ya michuano hiyo.

Kitu cha kuvutia kwenye mchuano huo ni namna ambavyo mashabiki wa Keko Furniture walivyokuwa wakiishangilia timu yao. Walikuwa ni wengi na kuwafunika kabisa mashabiki wa Buguruni FC.

Kubwa kabisa kutoka kwa mashabiki hao ilikuwa ni shabiki aliyekuja akiwa mevalia kiganga akiwa amebeba mtungi ambao ulikuwa unafuka moshi ndani yake lakini pia wakati mwingine alionekana akiwa amebeba chungu chenye moto ndani yake.

Hiyo yote ikiwa ni namna ya kuishangilia timu yake na kuhakikisha inaibuka na ushindi na kusonga mbele kwenye michuano hiyo inayopata sapoti kutoka kwa Dr. Mwaka ambaye ni daktari bingwa wa matatizo yahusuyo uzazi kwa wanawake na wanaume pia, lakini siyo yeye pekeyake, michuano hiyo inapata udhamini pia kutoka kwa kampuni ya Azam Food Products kupitia vinywaji baridi.

Mtandao huu haukuishia hapo, ukataka kujua zaidi ni kwanini jamaa huyo ameamua kutinga uwanjani akiwa katika mavazi hayo au kama ni mganga au mchawi kweli.

“Mimi sio mganga wala mchawi ila hii ni staili yangu ya kuishangilia timu yangu, kila mtu anakuja uwanjani kushangilia kwa staili yake mimi nimeammua kujitofautisha na kuwa na staili yangu ya kipekee ambayo itanifanya nionekane tofauti kati ya mashabiki wengine”, alisema.

“Angalia mashabiki wengine wamejichora na kujipaka rangi, wengine wamevaa magauni ya bendera za timu zao lakini mimi nimekuja kwa staili yangu ya tofauti na wao”.

“Hii inaweza ikawachanga wapinzani wetu kisaikolojia kwamba, Keko Furniture wamekuja na mganga wao uwanjani kwahiyo wakajua hata wafanye nini leo hawatoki, na kama tukiwafunga leo lazima utasikia wakisema tumewaroga ndio maana wamefungwa. Lakini mpira hauna hayo unachezwa uwanjani na kila mtu anaona”.

Jamaa alikuwa kivutio kikubwa kwenye mechi ya jana kutokana na staili ambayo aliamua kutinga nayo uwanjani huku akizunguka uwanja mzima wa Bandari akiwa amebeba mtungi wake kichwani.

P yhaa tv coming soon