BASATA wasanii sasa wanaweza kuzikatia rufaa tuzo

Miaka yote katika tuzo za muziki wa Tanzania huwa kunaibuka maneno na malalamiko kutoka kwa baadhi ya wasanii, mashabiki pamoja na wadau wa muziki wakilalamikia mambo mbalimbali ambayo huwa yanatokea kwenye mchakato wa kuwapata washindi wa tuzo hizo
Mwaka huu Baraza la Sanaa la Taifa (BASATA) limetoa ufafanuzi kuwa wamefanya maboresho ili kupunguza malalamiko na lawama hizo kutoka kwa wasanii, wadau na mashabiki wa muziki wa bongo fleva, ambapo sasa wasanii wataweza kukata rufaa kama hawajaridhika na ushindi wa msanii fulani au tuzo fulani kama itakavyo tangazwa.
Akizungumza kwenye kipindi cha Planet Bongo ya East Africa Radio, Katibu Mtendaji wa BASATA, Godfrey Mngereza amesema katika kuboresha tuzo hizo kutakuwa na utaratibu wa kuwa na kamati maalum ambayo ni kamati huru ambapo msanii ataweza kukata rufaa kama hajaridhika na mchakato ulivyokwenda mpaka kupatikana kwa washindi.
“Kumekuwa na malalamiko kutoka kwa wasanii, wengine wamekuwa wakitaka kujitoa, wengine hawaridhishwi na namna mchakato ulivyokwenda. Katika kuboresha zile tuzo tumeona hivi sasa tuwe na utaratibu wa kuwa na kamati maalum ambayo ni kamati huru, siku kadhaa baada ya zile tuzo wasanii au msanii ambaye atakuwa hajaridhika ataweza kukata rufaa. Hivyo wasanii watakuwa huru haya ni maoni ambayo yametoka kwa wadau wa muziki na wasanii wenyewe”. Alisema Godfrey Mngereza