Green WastePro Ltd yazindua magari mapya ya kisasa ya usafi

Kampuni ya usafi ya Green WastePro Ltd iliyopewa zabuni ya kuhakikisha Manispaa ya Ilala katika maeneo ya Mchafukoge, Kisutu, Kivukoni na Kariakoo yanakuwa katika hali ya usafi imezindua magari mapya matano ya kisasa ambayo yanataraji kurahisha ufanyaji kazi wa kusafisha na kukusanya taka za maeneo ambayo wanafanya kazi.

Kampuni hiyo imefanya uzinduzi wa magari matano ya kubebea taka ya kisasa na lingine moja ambalo litakuwa linafagia barabara na hivyo kuwa na idadi ya magari sita mapya.

Akizungumza na waandishi wa habari, Mkurugenzi wa kampuni ya usafi ya Green Waste Pro Ltd, Anthony Mark alisema kuwa magari hayo niya kisasa na hawakuwahi kuwa nayo awali hivyo kutokana na ujio wa magari hayo wanataraji kasi ya kufanya kazi kuongezeka.

Alisema kutokana na jinsi magari hayo yalivyotengenezwa wanaamini yatasaidia kupunguza muda wa kufanya kazi kutokana na kuwa na uwezo wa kupakia uchafu yenyewe na hivyo kupunguza muda tofauti na awali ambavyo walikuwa wanatumia mikono katika magari yaliyokuwapo.

“Tunategemea ufanisi zaidi sababu haya magari niya kisasa na yana beba hata uchafu yenyewe kwahiyo kama kazi ilikuwa ya dakika 10 inaweza kufanywa kwa dakika tatu,” alisema Mark.

Nae mgeni rasmi katika uzinduzi huo, Diwani wa Kata ya Mchafukoge, Mariam Lulida aliwapongeza Green WastePro Ltd kwa magari ambayo wameongeza na kuwataja kama moja ya kampuni ambayo wamekuwa wakifanya nao kazi kwa kushirikiana kwa karibu.

Alisema kuna baadhi ya changamoto bado zimekuwa zikijitokeza lakini wamekuwa wakifanya mazungumzo ili kuona ni jinsi gani wanaweza kumaliza changamoto hizo na kuendelea na kazi ya kuweka Manispaa ya Ilala katika hali ya usafi.

“Ninawapongeza sana kwa jambo hili na ninaamini tutazidi kufanya kazi kwa karibu nyie ni wadau wetu na kama ni changamoto zinajitokeza ni ndogo ndogo na tunazungumza na kuweka sawa.” alisema Bi. Lulida.

Aidha diwani huyo alimpongeza Rais, Dkt. John Pombe Magufuli kwa kuifanya siku ya Jumamosi ya kila wiki kuwa siku ya usafi na tayari kumeanza kuonekana mabadiliko kwa wananchi kujitambua na kutambua wana wajibu wa kuhakikisha mazingira yanayowazunguka yanakuwa katika hali ya usafi.

Nae Meneja Mwendeshaji wa kampuni ya usafi ya Green WastePro Ltd, Abdallah Mbena alisema ununuzi wa magari hayo umegharimu kiasi cha Bilioni moja na Milioni 600 na hivyo wanawaomba wananchi kushirikiana nao kwa kulipa kodi ili wazidi kuendelea na kuboresha zaidi huduma.

Alisema kwa sasa wamefikisha idadi ya magari 20 ambayo yanafanya kazi ya kubeba taka na magari hayo mapya matano ya kubeba uchafu yana uwezo wa kubeba Tani 12 kwa wakati mmoja na lingine moja linafanya kazi ya kufagia barabara na hivyo kusaidia kupunguza ajali ambazo zilikuwa zinatokea awali kwa wafanyakazi wa kampuni yao.

Meneja Mwendeshaji wa Green WastePro, Abdallah Mbene akitoa taarifa kuhusu Kampuni ya Green WastePro wakati wa uzinduzi wa magari matano ya kufanyia usafi.

Mgeni rasmi katika uzinduzi wa magari mapya Diwani wa kata ya Mchafukoge, Bi. Mariam Lulida (nguo nyeusi) akielekea katika eneo la uzinduzi, Wa kwanza kulia ni Afisa Mtendaji wa kata ya Mchafukoge, Luhungu Renatus, Mwenyekiti wa Mchafukoge, Alhaji Masoud Mbilinyi, Mkurugenzi wa Green WastePro, Anthony Mark.

Diwani wa kata ya Mchafukoge, Bi. Mariam Lulida akikata utepe kuashirikia uzinduzi wa magari mapya matano ya kubeba usafi ya Kampuni ya Green Waste Pro. Kulia ni Mkurugenzi wa Green Waste Pro, Anthony Mark na kushoto ni Meneja Mwendeshaji wa Green Waste Pro, Abdallah Mbene.

Diwani wa kata ya Mchafukoge, Bi. Mariam Lulida akiwa ndani ya moja ya magari ambayo yamezinduliwa na kampuni ya Gree WastePro

Diwani wa kata ya Mchafukoge, Bi. Mariam Lulida akiendesha mtambo wa kubeba taka na kuingiza ndani ya gari la kubeba uchafu.

Diwani wa kata ya Mchafukoge, Bi. Mariam Lulida akisalimiana na baadhi ya wafanyakazi wa Green WastePro mara baada ya kuzindua magari mapya matno ya kufanyia usafi.

Wafanyakazi wa Green WastePro wakishangilia uzinduzi wa magari ya kufanyia uasafi yaliyozinduliwa na Diwani wa kata ya Mchafukoge, Bi. Mariam Lulida.